Ar ôl ennill dwy wobr, dywedodd Saskia:
"Rwyf i wastad wedi bod â diddordeb mewn dadansoddi ffilmiau a'u hystyr mewn darnau, a dyna pam mae'r ffilm hwn mor ddarniog. Ym mhob saethiad, rwyf wir wedi ceisio meddwl am bob manylyn unigol sy'n rhan ohono, o ran ei ystyr. Dyna rwyf innau'n chwilio amdano wrth wylio ffilmiau – sut gellir dehongli hwn?
Dim ond o fy safbwynt personol i y gallwn i bortreadu'r rhan dywyllaf o'r cwarantin oherwydd roeddwn i ar fy mhen fy hun bach. A cheisiais chwarae ar hyn – does gennych chi ddim cast mewn cwarantin. Rydych chi wedi'ch llethu gan eich teimladau eich hun ac yn aml gall deimlo fel bod llawer o bobl eraill yno gyda chi, yn brwydro yn eich erbyn, ond dim ond chi sydd yno."
Enillwyr
Aeth gwobrau eraill i'r canlynol:
|
Darn Teledu/Ffilm Gorau
|
| Fideo Cerddoriaeth Gorau Maya Parry-Jones, o Brighton Hove and Sussex Sixth Form College, Dwyrain Sussex, am ei fideo cerddoriaeth arddull hip-hop celfydd i'r gân Main Squeeze gan Braille. Mae'r fideo'n mynd ar drywydd artist hip-hop sy'n cael ei ddal yn bod yn anffyddlon i'w bartner. Sylwadau'r beirniaid: "Perfformiadau cwbl gredadwy. Lluniwyd yr artistiaid yn dda a dangoswyd ymwybyddiaeth o godau a chonfensiynau'r genre hwn. Mae'r ffilmio wedi'i reoli'n dda a'r golygu wedi'i dorri'n effeithiol i'r curiad a chydwefuso ardderchog. Defnydd gwych o leoliadau ac eiconograffeg a chyflymder da wedi'i gynnal drwy'r fideo.” |
| Sgript Ffilm Orau Sandra Mosnegutu, o Wyggeston and Queen Elizabeth I College, am ei sgript ffilm uchelgeisiol Illusion, sy'n mynd ar drywydd y prif gymeriad, Zhen, wrth iddo gerdded o amgylch ei fflat yn profi cythrwfl o emosiynau wrth iddo ddwyn atgofion am ei berthynas â'i gariad, sydd bellach wedi marw. Sylwadau'r beirniaid: "Mae defnydd ardderchog o mise-en-scene drwy'r sgript sydd byth yn gwyro i fod yn rhyddieithol. Caiff technegau fel troslais ac ôl-fflachiau eu defnyddio mewn ffyrdd gwych. Prif gryfder y ffilm hon yw sefydlu perthynas gredadwy. Mae'r cyfarwyddiadau'n llifo’n anhygoel, ac mae pob golygfa unigol wedi'i llunio'n dda ac yn cysylltu'n berffaith i'r hyn sy'n dilyn. Mae'r ddeialog yn siarp ac yn gweithio'n dda o fewn y lleoliadau sydd braidd yn ddigymeriad. Caiff motiffau eu defnyddio'n dda iawn. Mae uchelgais a chymhlethdod gwirioneddol i'w cael yma. Mae'r tro yn y gynffon wedi'i ragfynegi mewn ffordd wych gydag athroniaeth 'dangos nid dweud' amlwg iawn. Mae ymdeimlad pendant o Wong Kai-Wai yma yn strwythur y ffilm. Cyflymder gwych sy'n hollol briodol i ffilm fer. Mae'r amwysedd ar y diwedd yn hynod effeithiol hefyd. Darn aeddfed." |
| Un i'w Wylio Ben Titmuss, o Akeley Wood Senior School yn Buckingham, am ei fideo cerddoriaeth, Stereo In My Room. Sylwadau'r beirniaid: "Fideo wedi'i lunio'n dda iawn sydd wir yn adlewyrchu'r dewis o drac gwreiddiol. Perfformiadau creadigol ac artistig ardderchog gydag ymdeimlad o enigma wedi'i greu. Lluniwyd y naratif yn dda gan ymgorffori trin amser a gofod. Mae ffilmio a golygu ardderchog yn creu ymdeimlad swrrealaidd." |
Gellir gweld y fideos buddugol ar ein sianel YouTube.
Siaradwr gwadd
Mae'r seremoni wedi'i chydnabod gan athrawon a darlithwyr cyrsiau ffilm a chyfryngau mewn sefydliadau ledled y DU, yn ogystal â ffigyrau blaenllaw yn y diwydiant ffilm. Eleni, roedd gennym restr wych o siaradwyr, gan gynnwys Kim Longinotto, Larushka Ivan-Zadeh, Kate Leys, ac Anna Smith.
Dyma oedd gan Larushka Ivan-Zadeh, Prif Feirniad Ffilm Metro, i'w ddweud am y gwobrau eleni:
"Y peth gwych am ddigwyddiad fel hwn yw'r amrywiaeth anhygoel sydd i'w gweld. Mae'r holl genres gwahanol hyn i'w cael. Pobl sy'n gwneud ffilmiau arbrofol iawn, yn cynhyrchu fideos cerddoriaeth, a phobl sy'n gweithio gyda phlastisin! Rydych chi'n gweld cymaint o bethau gwahanol, mae'n arddangosfa ryfeddol. Ar ben hynny, cafodd y ffilmiau hyn eu creu yn ystod y pandemig, ac rydych chi'n meddwl, bobol bach, roedd y myfyrwyr hyn yn syllu ar bedair wal ac maen nhw wedi gallu taro ar greadigrwydd cwbl anhygoel!'
Dywedodd Rebecca Ellis, Swyddog Pwnc Astudiaethau Ffilm CBAC Eduqas:
"Rydym yn hynod o falch o allu gwobrwyo myfyrwyr eleni mewn seremoni wobrwyo wyneb yn wyneb arbennig – ein seremoni gyntaf ers dwy flynedd oherwydd y pandemig. Rydym wrth ein boddau'n cael y cyfle i arddangos y gwaith gan bobl ifanc mor dalentog ar ôl cyfnod mor anodd. Bu'n fraint o'r mwyaf gweithio gyda'n panel anhygoel o gyflwynwyr sydd hefyd yn cydnabod pa mor anodd y bu'r cyfnod hwn i'n pobl ifanc. Llongyfarchiadau enfawr i bob un o'r enillwyr a'r ymgeiswyr oedd ar y rhestr fer a gafodd ganmoliaeth uchel, a'r athrawon sy'n amlwg wedi gweithio mor galed i gefnogi eu hymdrechion creadigol dan yr amgylchiadau digynsail.
Noddwyr
Hoffem ddiolch i'n noddwyr y British Film Institute, Golley Slater, KK Solutions, a My Company Clothing am eu cefnogaeth barhaus.